الجمعة، 22 يوليه 2022 - 02:43 م

نفسي واحد أهلاوي رزين وبيحب ناديه صحيح من غير ما يغرف من كنوزه ومناجمه المعروفة يقنعني ليه اتعاقدوا مع سواريش ..

إيه المعطيات والحقائق والدلائل وكل المصطلحات المجعلصة إللي شجعت الأهلي يصوم يصوم ويفطر علي بصلة..انا شخصيا من أول لقطة للمدرب حكمت عليه ..أول حاجة عملها باس فانلة الأهلي ..وطبعا مش مشكلة إن أي حد يبوس فانلة ناديه لأن الانتماء يقتضي ذلك ثم العشرة الطويلة ثم النعمة الكبيرة في الفلوس والسيارات والعمارات والإعلانات والشهرة والفخفخة..اما وقد طل علينا سواريش ''هوجان'' لأول مرة ونراه بيبوس الفانلة بدون أي دقيقة عشرة  ثم يتعهد بأن الأهلي فوق فكرة او شطحة خيال لمن تسول له نفسه الفوز عليه..فإن ذلك يعطي أول إشارة أنه البصلة التي فطر عليها محمود الخطيب وياسين منصور بعد أيام وأسابيع من المانشتات المطرقعة عن خناقات بين الإثنين لاختيار مدرب يليق بالقلعة الحمراء ..ولاأظن أنهما لايعرفان مايليق ..لكنهما علي مايبدو فهما خطأ واختلط الأمر عليهما من طول الحديث عن بحث الأهلي المضني عن مهاجم سوبر علي شرط أن يكون ''هجام''.. هكذا كان المدربون السابقون يحددون سمات المهاجم المنتظر..لازم يكون طول بعرض وهجام وصقر وأيضا فنان وهداف وبيلعب بالرأس والرجل والفخاد ..مع ان كل هذه الاوصاف لو توفرت في لاعب أفريقي مش هيقعد في الغابة يوم واحد هيبقي جنب ميسي ونيمار في باريس ..ومع اختلاط الأمر وصعوبة تحقيق الأماني جابوا فعلا مدرب هجام يبقي من ريحة أي هجامة والسلام.. ولو الراجل ده قلع هدومه هيكتشفوا إنه مصارع حرة او رومانية او سومو  ..وبعدين سيبك من كل ده ..كان ممكن يبقي فتوة بس معلم دماغه ماسحة كل مناطق وأحياء الحرافيش بتوع نجيب محفوظ..لكن اتضح إنه بالرغم من المنظر ده والشاسيه بتاعه  مبيخوفش الخصوم ..وبيخوف اللعيبة بتوعه لدرجة إنهم في الشوط الاول مقربوش من منطقة الزمالك ..ولولا إن حد من المسئولين نزل بين الشوطين وقالهم متخفوش من هوجان دا معانا لكانت هتبقي مصيبة في الشوط الثاني..
أرجع تاني وأسأل ليه فطرطتم علي بصلة..مش برضه كان قدام عنيكم سيرة ذاتية وأكيد حد قعد معاه كام مرة ..وبعدين فين الإعلام المناضل في الداخل والخارج إللي مبيكلفش نفسه يقول للخطيب ''لأ'' ده مينفعش ياكابتن ..ماشي في الزفة  ولو ممشيش مش هياخد البقشيش.. كله دق الطبول وشخشخ الصاجات ونفخ في الزمامير وهمة اصلا ميعرفوش المدرب ولا سمعوا عنه..ودلوقتي قال إيه عاملين  نقاد وعايزين الناس تسيبه في حاله أصله لسة تحت التمرين ..و إن ياجماعة ميصحش نحاسب مدرب يادوب علي هزيمتين مطرقعين ..لسة بدري لما يبقوا دستة..